Ambahanon sa Kagab-ihon

Moment of Reflection in Ilonggo Today

BY REV. ESFEAMORI TANDOG

Ginadumdum ko ang mga tini-on nga nagakanta ako sa kagab-ihon. Nagpamalandong ako kag amo ini ang ginapamangkot sa akon kaugalingon. Salmo 77:6

Suno sa nabasahan ko nga estoraya sang mga pispis nga “Canaries”, amo ini sila ang pinakamarimis nga maghuni sa mga kapispisan sa bug-os nga kalibutan. Ini sila nagikan sa kabukiran sang “Hanz”, sa bahin ini sang pungsod Aliman (Germany).

Mabudlay galing nga madakop mo ini sila ilabi na gid kon may kinagamo. Nagakadula sila.

May isa ka negosyante halin sa New York sang America ang nagpangita medyos nga makahanas sang amo nga baridad sa America nga may subong man sang pispis nga halin sa Alimanya.

Gin-“record” niya ang huni sang pispis sa Alimanya kag gindala niya pauli sa America. Iya ini nga ginliwat-liwat patukar sa sirado nga kwarto sa mga hinuptanan niya nga “Canaries” sa sulod sang kwarto.

Sa Primiro, daw indi matalupangdan ang pagbalhin. Peru, isa ka adlaw, sa sigi niya nga patukar, iya nadiscobrehan nga kon tabunan niya ang mga hawla kag palungon ang tanan nga suga, ang baridad Americano nga “canaries” madasig nga nakahuni nga nasunod nila ang ara sa “recording.” Nano ang ginapaalinton sini nga mensahi?

Madasig kita makatuon sang malabayan ta nga kahul-anan nga waay kita sang makita sa unhan nga makatublag sa aton.

Ginasaradohan sang espirito sang Dios ang masami nga ginalantaw naton nga makagalanyat nga kalibutan, agud nga magabana-ag sa aton pagtoo ang bilidhon nga kabobot-on sang Dios, kon mabati-an naton ang makatoloyom nga harana nga ginapasakaylihan sang langitnon nga bugay.

Kon ang kabuhi ta nakamangan sang makatol nga iras sang pagtilaw kag pagkadalitan, nga ang panumduman ta nakatugalbong kita sa sara-it sang kadodolman, madali kita makatuki sa nagabana-ag nga bugay sang Dios kag makabati sang iya maka-ulumpaw nga butkon sang pagdapulay.

Peru, kon ang kabuhi ta nagalambitin sa naga-inang nga karuwahi sang kahamungayaan, nga abi naton anay amo na ang nagabusawak nga laragway sang kamanggaran, nga daw nasapong ta ang kata-asta-asan.

Peru, igo ta mamarasmasan, ginasagnoy na kita sang mabaho nga imbornal sang katagodili-an. Pasalamat lang kita nga ginludop kita sang Dios sa amo nga lamawan kag mahigugma-on nga gintukaran sang ambahanon sa paglipay.

Sa madolom nga nahamtangan naton, nabati-an ta ang iya tingug nga gin-updan sang mga manugtunda nga daw makabalani nga pagtukar sang matahum nga ambnahanon sa kagab-ihon.

Ang mga ginpakamaayo sang Dios nga nakalabay sa madolom kag mamingaw nga pagkahimtang, nagbalay sang isa ka maka-ilima nga lalantunon sang pagdayaw.

Kita mismo nga nakaguwa sa masi-ot nga kagulangan sang pagkabuhi, ang nangin tiklado sang organo nga ginalatayan sang mahigugma-on nga tudlo sang aton Ginuo.

Ang piyesa nabalay sang ara kita sa mangitongito nga landong sang pagkahulog kag kinaburigal.

Siling pa sang isa ka matahum nga pololongon -“kon ang Dios magpogtak sang luha sa imo mata, ini bangud diri siya nagasugod sa pag-inat sang kuerdas nga magatukar sang amo nga ambahonon sa imo tagipusoon.

Ang pangamuyo naton:

Ginuo, kabay pa makatu-on kami sa pag-pakamahal sang mga ginalabayan nga tunok sa dalanon, kay diri nagatubod ang maka-olompaw nga dugos sang pagkabalaka mo sa amon.

Diri man gina-amat mo bagay ang kabuhi namon nga sa pagpindot mo, kasubong kami sang mga pispis nga “Canary” nga gikan sa dolom, nagabagrong pa ang haleluya nga ambahanon sang pagdayaw. Sa ngalan ni Ginuong Jesus, Amen.